Upa S Lianchhuma
Kan hriat angin Pathian fapa meuh pawh Pa thuawiha tuarna kawng a zawh lai khan Gethsemani huanah a zirtirten an venpui a, vantirhkoh tih harhna a dawng a. Keini misualte avangin thihna no kha chu a in a. Pathian hnuchhawn ramah chengin thihna rapthlak tak chu a tuar ta a ni. Chutah zey chuan lei lam tanpuina leh a pa Pathian awmpui thinna chu a bo ta a, thihna rapthlak kawng chu a zawh a, a chhan chu sual vanga Pathian laka mi bo, mihrang kan nihna leh chungpikna tinreng te thaibo a nih theih nan a ni.
Chawfak hun dar 12:00 atanga Behliang mun hun dar 3:00 thlengin khawvel alo thim ta a. Zawlnei Amosa 8 : 9 thu in, “chhun laiah ni ka tlak tir ang” alo tih leh Jeremia 15:9 in “chhun anih laiin a ni a liam ta a ” alo tih chu alo thleng dik ta.
Juda-te Temple-ah chuan hmun thianghlim leh hmun thianghlim ber chu puanzara daidan a ni a. Hmun thianghlim ber chu Pathian chenna niin Juda te’n an ngai a. Kum tin Puithiam lal ber chu thisen kengin vawikhat rem lehna ni ah chauh a lut thin a ni (Lev 16:1-28). Lal Isua Krista, kraws lera a thih lai khan he daidanna puanzar hi a chunglam atangin a hnuai lam thlengin alo thler chhuak ta a. He puanzar thlerin a entir chu Krista thisenin misualte Pathian hnenah min hruaikir leh ta tih leh thuthlung hmasaa thuawih lohna chu Krista thuawihna leh inpekna chuan a siam tha leh ta tih a lantir.
Lal Isua Krista thihna avangin Pathian hmel hmu thei tawh lo ten rinna in chiang takin hmuhtheih alo ni ta. Tunah chuan Pathian chenna hmunah mi zawng zawng, misual leh mi tha te pawh a luh theih ta. Pathian chu rinna in kan hmu a, kan inkawmin kan inpawl thei ta a ni. Eden huana bawhchhiatna avanga Pathian nena mi hrang lo ni tawh. Setana’n kan lal lukhum min chhuhsak tawh hnu chu kan Lal Isua’n min pe leh ta a nih hi.
Puanzar a thler thu hi chanchintha Matthaia leh Marka hian thu thuhmunin, a chunglam atanga a hnuai lam thlenga a thler thu an sawi a. Luka erawh chuan a laiah alo thler ta a ni a ti ve thung a. An sawi duhdan leh uar dan a inang lo na a. Mahse Puanzar chu a thler ngei a ni tih an sawi theuh a ni.
Mi thenkhatten Isua thihna avangin daidanna bang a chim an ti a, a thenin a thler tiin an sawi thung. Thler tih leh chim han tih hian awmze hran ve ve a nei a ni. Daidanna bang a chim han tih hian Lal Isua krawsin tih leh thawh a tum chu a tichiang a. Pathian biak in puanzar thler hian mihringa chi leh chi inthliarna awm thin hi tih bo na lam a entir. Lal Isua ngeiin hemi nemnghehnan, khawvel zawng zawngah kala, chhandamna chanchintha hrilh a hnam tin amite zirtirahte siam tura min tihna thupekah hian alang chiang hle a ni.
Chuvangin zirtirte leh tirhkohte kha khawvel hmun tinah kalin an thukenah chuan fak hla siamtuin, “An dang chuang lo ve chitin tawng tin reng, vanlal nau ang tahna Kalvari-ah” tih thu hi an keng a.Chuvangin keini tak ngial pawh min iai lovin chanchintha kan nei ta a nih hi. Juda-ten Messia lo kal leh tur an lo ta neih tlatna kha he puanzar lo thler hian a thiat ta a ni.
Mi engang mi pawh misual leh mitha eng hnam leh chi pawh nise a duh apiang tan chhandamna chanchintha hi an changin an nei thei a ni tih hi puanzar thler hian a entir a ni. Tunah hian hi leh chi, hnam leh hnam mi hausa leh mi rethei thliarna kan neih chuan chu tak chu kan thupui pawh hian tih bo a tum chu a ni. Rawngbawlna huang thleng pawha duhsak bik leh thliar bik kan nei anih chuan chu chu kan paih bo tur a ni ang. Pathianin Lal Isua Krista kaltlanga a hna thawh tur kha hlen chhuak lo se, puanzar a thler lo ang a, keini Jentailte tan lek phei chuan Pathian biak pawhna hun a awm hauh lo vang.
Lal Isua krawsa Pathian thil tihtheihnaah chuan Pathian leh mihring inrem tawh lo inrem lehna te, mihring leh mihring, hnam leh hnam, chi leh chi - inrem lote pawh inrem lehna a awm a. Chu inremna chu mi tupawhin a dai chuan Lal Isua kraws thil tihtheihna avanga puanzar nen lam lo thler chuan a neih tir thei a, Lal Isua avangin kan rem ngai loh pawh kan rem leh thei a ni.
He puanzar lo thler hian indaidanna bang chu a ti thlerin- a ti chim thei a. Inbe tui tawh lo te pawh an lo inthian tawh zawk a ni. He Biak In puanzar thler hian kohhran hote thlarau lam nunah a pawimawh hle a, chuvangin Lal Isua tlanna ah chuan mipa leh hmeichhia a awm theih loh a, bawih leh bawih lo pawh a awm theih tawh lo. Mi zawng zawng hi bul hmunkhat leh unau vek kan ni si a.
Anih leh - chuti a nih si chuan kan nun leh thil tih leh rawngbawlna huangah te hian intluk tlanna a awm em aw! A awm lo a nih chuan thisen hmun khata hrin leh thlante ah daidanna bang kan siam a ni ang. Lal Isua kraws-a a tuara thil chhinchhiah tlak leh langfiah tak chu hmelma kut tuara mangang leh lungngai vawr tawpa a tuar lai pawhin Pathian a ring tlat a, a kutah a inkawltir a, chu nun chu a au chhuah pui a ni. A dam chhung nunah leh kraws chungah pawh mihringte tuarna leh harsatna te a chanpui zel avangin kan mangan ber lai pawhin min tanpui a inpeih reng a ni.
Unaute u, kan nun leh thiltihah kan rawngbawlna huangah te midangte tana malsawmna ni tura koh kan nih ang ngeia thawk tur kan ni. Daidanna bang awm thinrte hi Pathian Biak In puan zar lo thler hian paih bo sela, chumi tur chuan min ngen a ni tih hriaiin, rilru thar kan put ngei theihna atan tan kan lak ava tul em.
Daidanna bang (wall of partition), Heroda Temple hungna pawn ta ber chhung chu Jentail-te hmun a ni a. Chumi zawhah chuan hungna lung bang ft. 5 a sang a awm leh a. Chumi chhung chu hmun serh leh zualna hmun a ni. Hnam dang chu luh phal a ni lo. Chu bangah chuan a khat tawkin ban sang phunin- chu banah chuan, “Hnam dang tumah hung chhungah hian luh phal a ni lo, hung chhunga man tawh phawt chu a thih thuah amah a inmawhchhiat tur a ni” tih hi an ziak a. He bang hi intaina bang anga sawi a ni a, chu intaina bang chu Isua kraws-a a thihna khan a ti chim a ni an ti.
Pathian Biak In puanzar a thler tih hian kan nun leh thiltihah, kan nun peng hrang hrangah te hian awmzia neia kan hman tangkai theih nan Pathianin a thu malsawm rawh se, Amen.
