Hringnunah hian lungawina hi khawiah hian nge a awm? Tamtak chuan sum leh pai leh hausakna ah hian lungawina a awm ringin an tlan a, atawpah chuan mitena an awh khawpa hauna nia kan hriatlaiin rilrua rethei in hring nun an hmang liam a? He khawvel nawmchenna hrang hrang ah te hian lungawina a awm ringin tamtak an tlan a, lungawina tak tak erawh chu an banphak lohah chiah a awm zel si. Mihringin kan thiltihna engpawhah a hlawhtlinna kan hmuh hian kan thinlungah lungawina a awm thin, Mahse Krista tello chuan chu lungawina chu Harsatna min thlentu a ni thin.
‘Engpawh tawk ila ka lawm zel ang’ tithei hi ringtu zingah hian engzat tak awm ang i maw? ‘Lungawi zel ka ching ta, lungawina min thlentu pawh Isua ani’ tiin fakhla siamtu chuan a lo chham hhuak a, he hla hi a der maia satu ringtu hi kan tam viau mai lo ang maw? Tuna i mimal nuna harsatna i tawh mek te, inchhungkua in harsatna in tawh mekah te khan i lung a awi tak tak em? Phillipi lehkhathawnah chuan Tirhkoh Paula chuan engkima lawm tur in min chah a ni.
Kan mimal nun theuh hi han in chhut ta ila, he khawvelah kan lo piangchhuak a, khawvel chuan a her dan dan in min herpui a, a chang in hlimna leh lawmna kan tawng a, achangin lungngaihnate kan tawk bawk a. Hlimna leh lawmna kan tawh chang chuan Pathian malsawmna chu lungawi takin kan dawnga, tudang kan ngailo, thenkhat in malsawmna petu hnenah lawmthu sawi nachang hre mahse tamtak chuan malsawmtu Pathian meuh pawh kan hrechang tawh ngailo hial thin. A malsawmna kan dawnah chuan kan lungawi a, kan chung a harsatna leh manganna a lo thlen erawh chuan “Ka dil loh zawk malsawmna” ti a lungawipui mai harsa kan ti thin.
Mihring thinlung hian kan chunga harsatna a lo thlen hian tawrh thiam har a ti a , “Engatinge LALPA ka chungah kher hei hi a thlen” tiin kan vui a, lungawi har kan ti a, PAthian lakah kan vui thin. Saruak veka awmin chhuanchham leh mite hmuhsit khawpa rethei a awmin natna khirh leh hrehawm tak pawh tawk mahila Nunna min petu Kan LALPA chu a pangngai renga, min ensan ngailo a, kan thatna turin engkimah min thawhsak zawk thin. Chubakah kan tawrh zawh loh khawp harsatna min tawrhtir ngailo tih i hre thar leh ang u. Heng harstna zawng zawngte hi mahni in dah hniamnan leh Pathian laka vuina atana hmang lovin Pathian in ka chungah thlen ve a phal avanga lawmthu hrilh chungin lungawi taka kan pawm a tul khawp ang.
Zawlnei Habakuka chuan a chungah engpawh thlengse a lawmzel tur thu a sawi a, Joba chuan “ Pathian hnen atangin thil tha kan hmu a, thil thalo pawh kan hmulo angem ni” tiin achung a manganna nasa tak lo thleng chu chhel tak leh lungawi takin a tuar a. Daniela thiante pathum chuan an chunga thihna lo thleng tur chu lungawi takin an tuar mai a, Kan Lal Isua meuh pawh kha a chunga thil lo thleng tur kha huphurh hle mahse Pathian remruat chu lungawi takin a tuar a, keini’n chatuan nun kan lo neih phah ta a nih hi.
Kan chunga harsatna lo thleng hian Pathian min hriatchhuahtir thin a, chuvangin harsatna i tawh chuan Pathian hnaih la, Pathian hnena inkawltir sa i nih pawhin Pathian hnaih lehzual nan hmang la. Hrehawmna hi chhelna min petu atan hmang thiam ila, tawrh man a awm ngai. Tawrhna ruam atangin miin Pathian an hmu thin. Harsatna tawk hmasain miin hlawhtlinna an chang thin. Ka rethei em mai tiin i chanah khan i lungawi lo maw? Mi hausate aia lawmna i hmuhma bik ringawt pawh kha thil hlu a sin. Chuvangin nang Kristian, han in en chiang la, tuna i dinhmunah khan lungawi la, Pathian hnenah lawmthu sawi rawh. I lungawi theilo a nih pawhin Krista hnenah lungawina zawng ang che. Lungawina kim chu Krista-ah chauh chuan a awm si a.
